Семинар
2025 йил 27 август куни Имом Мотуридий халқаро илмий-тадқиқот маркази ва Туркиянинг Анқара Йилдирим Боязид университети ҳамкорлигида "Янги ренессанс сари" мавзусидаги онлайн илмий семинар бўлиб ўтди. Семинарда иштирокчилар ислом тафаккури тарихининг энг ёрқин сиймоларидан бири Ибн Сино фалсафаси ва илоҳиётига бағишланган иккита муҳим маърузани тингладилар: "Ибн Сино фалсафасининг ислом тафаккурига таъсири" "Ибн Сино теологик қарашларида рационал тафаккурнинг ўрни" Маърузаларда Ибн Синонинг илм-фан, фалсафа ва теология соҳаларидаги улкан мероси, унинг ислом сивилизациясига кўрсатган таъсири ҳамда унинг ақлли фикрлашга асосланган ёндашувлари атрофлича таҳлил қилинди. Анқара Боязид Йилдирим университети профессори Мурат Демиркол ўз сўзида Ибн Синодек буюк шахсият ҳар қандай халқнинг фахри бўлишга арзийдиган сиймо экани, шу жиҳатдан, ўзбек халқи бундай буюк аждоди борлиги билан чексиз ифтихор туйишини таъкидлади. Иштирокчилар маърузачиларга ўзларини қизиқтирган саволлар билан мурожаат қилиб, қизғин илмий мунозара олиб бордилар. Келгусида ҳам Имом Мотуридий маркази ва Анқара Йилдирим Боязид университети ўртасидаги бундай илмий мулоқотларни давом эттириш режалаштирилган. Бу саъй-ҳаракатлар хорижда буюк аждодларимиз илмий меросини ўрганиш соҳасидаги янгиликлар билан маҳаллий олим ва тадқиқотчиларимизни таништириш ва илмий ҳамкорликни ривожлантиришга хизмат қилади.
