✍️ Қоҳирада Имом Ашъарий илмий меросига бағишланган нуфузли халқаро форум ўз ишини бошлади
27-январ куни Миср Араб Республикасининг Қоҳира шаҳрида нуфузли "Ал-Азҳар" мажмуаси қошидаги Имом Ашъарий маркази томонидан ташкил этилган биринчи халқаро илмий форум ўз ишини бошлади.
Мазкур йирик анжуман "Имом Ашъарийнинг исломий фирқаларга оид фикрий ёндашувлари: ақидавий ихтилофдан мулоқот уфқи ва мўтадилликни қарор топтириш сари" мавзусига бағишланган бўлиб, унда ислом оламининг етук уламолари, диншунос олимлар ва тадқиқотчилар жам бўлган.
Форумда Ўзбекистон номидан Имом Мотуридий халқаро илмий-тадқиқот маркази делегацияси ҳам фаол иштирок этмоқда. Хусусан, анжуман очилиш маросимида Имом Ашъарий маркази директори Ҳасан Шофеъий, ал-Азҳар университети ректори Довуд Салома, Имом Мотуридий маркази директори Комилжон Шермухамедов, Миср муфтийси Назир Айёд ҳамда ал-Азҳар мажмуаси раҳбари ўринбосари Муҳаммад Дувайний сўзга чиқди.
Ушбу халқаро анжуман ислом оламидаги илмий ҳамкорликни мустаҳкамлаш, мутаассибликка қарши маърифат билан курашиш ҳамда соф ислом ақидасини асраб-авайлашда муҳим платформа вазифасини ўтайди.
Анжуман ўз ишини давом эттирмоқда.
Имом Мотуридий халқаро илмий-тадқиқот маркази Матбуот хизмати
