Зиёрат туризми истиқболлари муҳокама қилинди
Бугун Имом Мотуридий халқаро илмий-тадқиқот марказида Индонезиянинг "Калимантан пост" газетаси бош муҳаррири Э.Шанти билан учрашув ўтказилди.
Учрашувда Янги Ўзбекистонда амалга оширилаётган кенг кўламли ислоҳотлар, хусусан, Имом Мотуридий, Имом Бухорий, Имом Термизий каби буюк аллома аждодларимиз илмий меросини индонез нашрларида ёритиш масаласи муҳокама қилинди.
Э.Шанти "Калимантан пост" газетаси саҳифаларида Ўзбекистоннинг зиёрат туризми салоҳиятини тарғиб қилувчи мақолалар нашр этилаётгани, истиқболда бу каби маълумотларни янада кўпайтиришдан манфаатдор эканини таъкидлади.
Шунингдек, Э.Шанти инденозиялик талабаларда Ўзбекистон халқаро исломшунослик академиясига бўлган қизиқишнинг юқори эканини қайд этиб, Академия билан манфаатли ҳамкорликни янада ривожлантиришдан манфаатдор эканини изҳор қилди.
Меҳмон индонезиялик талабаларда Имом Мотуридий, Имом Бухорий каби ислом оламининг буюк сиймолари мажмуаларини зиёрат қилиш истаги кучли эканини айтиб, жорий йил якунига қадар 100 дан зиёд ватандошининг Ўзбекистонга махсус сафарини ташкил этажагини билдирди.
