Париж шаҳридаги ЮНЕСКО Бош қароргоҳида юртимиз алломалари илмий меросига бағишлаб ўтказилаётган халқаро илмий конференсия доирасида Имом Мотуридий халқаро илмий-тадқиқот маркази вакиллари иштирокида икки томонлама учрашувлар бўлиб ўтди.
Хусусан, ЮНЕСКО Бош конференсиясининг 43-сессияси президенти Хондкер Муҳаммад Талҳа билан мулоқот ўтказилиб, ЮНЕСКО кутубхонасига «Имом Мотуридий: илоҳий ҳикмат изидан» китоб-албоми, «Абу Мансур Мотуридий: илмий мероси ва ҳикматлари» китоби ва бошқа нашрлар тақдим этилди.
Шунингдек, Оксфорд ислом тадқиқотлари маркази директори Фарҳан Низомий ҳамда Ислом тарихи, санъати ва маданиятини тадқиқ қилиш маркази (ИРЦИЦА) бош директори Маҳмуд Эрол Қилич билан ҳам учрашувлар ўтказилиб, Марказ нашрлари тақдим этилди.
Мазкур китоблар Имом Мотуридий халқаро илмий-тадқиқот марказининг энг сўнгги нашрлари бўлиб, уларда Имом Мотуридийнинг бой илмий-маънавий меросининг бугунги кундаги долзарб ижтимоий аҳамиятга эга бўлган пурмаъно ҳикматлари ёритилган.
