Имом Мотуридий халқаро илмий-тадқиқот маркази делегацияси Салжуқ университетида бўлиб ўтаётган “Усмонийлар даврида ҳанафийлик-мотуридийлик” мавзусидаги ВИ халқаро мотуридийлик симпозиуми доирасида ҳамкор ташкилот вакиллари билан бир қатор учрашувлар ўтказди.
Жумладан, туркиялик таниқли мотуридийшунос олим, Анқара университети профессори, доктор Сўнмез Қутлу билан учрашилиб, доктор Сўнмез Қутлуга Марказ фаолияти, жумладан, мотуридийлик таълимотини ўрганиш бўйича қўлга киритилган натижалар, янги китоблар ҳақида маълумот берилди.
Ўз навбатида доктор Сўнмез Қутлу Ўзбекистон халқаро ислом академиясидаги фаолияти ҳақида илиқ хотиралар, жумладан, ўзбек халқига хос бўлган меҳмондўстлик ҳамда гўзал қадриятлар ҳақида зикр қилиб ўтди.
Шунингдек, сўнгги йилларда юртимизда исломшунослик соҳасига катта эътибор қаратилаётгани, халқаро миқёсда конференсия ва анжуманлар ўтказилаётгани таҳсинга лойиқ эканини таъкидлади.
Учрашув давомида туркиялик олимга Марказ томонидан тайёрланган “Китоб ат-тавҳид” ва “Рисола фи-т-тавҳид” асарларининг замонавий нашрлари ҳамда унинг Марказда ўзбек тилига таржима қилинган “Биз билган ва билмаган Мотуридий” китоби тақдим қилинди.
Доктор Сўнмез Қутлу “Китоб ат-тавҳид” асарининг замонавий нашри ҳақида тўхталиб, ушбу тадқиқот Имом Мотуридий ва мотуридийлик таълимотини ўрганишда муҳим аҳамият касб этишини таъкидлаб ўтди.
Шунингдек, Салжуқ университети ҳузуридаги Салжуқийлар тадқиқот институтига ташриф буюриб, институт директори профессор, доктор Мустафо Демиржи билан учрашилди.
Учрашув давомида институт ходимларига Марказ фаолияти, нашр қилинаётган китоблар, жумладан, “Китоб ат-тавҳид” асарининг замонавий нашри, “Таъвилот ал-Қуръон” асарининг ўзбек тилидаги илмий-изоҳли таржимаси ҳақида маълумот берилди.
Ўз навбатида, доктор Мустафо Демиржи Ўзбекистонда алломалар меросини ўрганишга қаратилаётган эътибордан мамнун эканини, ҳозирда Ўзбекистон заминидан етишиб чиққан алломаларнинг ҳаёти ва илмий меросига оид маълумотларни инновацион услубларда тақдим этишга мўлжалланган онлайн электрон платформа яратиш устида иш олиб бораётганини маълум қилди.
