Имом Мотуридий халқаро илмий-тадқиқот марказига ташриф
Жорий йилнинг 8-июл куни Имом Бухорий номидаги халқаро стипендия дастурининг совриндорлари — Малайзия Фан университети доктори Сурая Аҳмад ҳамда туркиялик тадқиқотчилар Эсра Йилдири ва Алийе Мерве Эрфи Имом Мотуридий халқаро илмий-тадқиқот марказига ташриф буюрди.
Меҳмонлар Марказ раҳбарияти томонидан кутиб олиндилар. Учрашув давомида Марказ фаолияти, унинг асосий йўналишлари, амалга оширилаётган тадқиқотлар мавзулари ҳақида батафсил маълумот берилди. Хусусан, суҳбат мавзуси Марказнинг бўлимлари фаолияти, халқаро ҳамкорликни кенгайтириш борасида олиб борилаётган ишлар, шунингдек, маҳаллий ва халқаро миқёсда эришилган ютуқ ва натижалар ҳақида кечди.
Мулоқот чоғида хорижлик тадқиқотчилар ўзларини қизиқтирган кўплаб саволларга атрофлича жавоб олдилар. Жумладан, Имом Мотуридий меросини ўрганиш, унинг таълимотини бугунги кун ёшларига етказиш усуллари, Марказнинг бошқа халқаро илмий муассасалар билан алоқалари ва истиқболдаги қўшма лойиҳалар ҳақида фикр алмашилди.
Марказ фаолияти меҳмонларда катта таассурот қолдирди. Улар Марказнинг илмий салоҳияти ва олиб бораётган ишларни юқори баҳоладилар.
Ташриф якунида меҳмонларга эсдалик совғалари топширилди.
