Ўзбекистон ва Индонезия илмий жамоатчилигини ўзаро чамбарчас боғлайдиган маърифий кўприк
"Индонезия – Ўзбекистон маданий ва ҳамкорлик ҳафталиги" тадбирлари доирасида жорий йилнинг 28-октябр куни Самарқанд шаҳрида ўтказилган "Имом Бухорий ва мусулмон оламида илм-фан" мавзуидаги анжуманда Имом Мотуридий халқаро илмий-тадқиқот маркази вакиллари ҳам иштирок этди.
Анжуманда хорижий меҳмонлар томонидан юртимиздан етишиб чиққан Имом Бухорий, Имом Термизий, Имом Мотуридий ва Баҳоуддин Нақшбанд каби буюк мутафаккир алломаларнинг ҳаёти ва илмий меросини ўрганишга Индонезияда қизиқиш ортиб бораётгани алоҳида эътироф этилди.
Конференсия доирасида Имом Мотуридий халқаро илмий-тадқиқот маркази ҳамда Индонезиянинг Шариф Ҳидоятуллоҳ давлат ислом университети ўртасида ўзаро ҳамкорликка оид Англашув меморандуми имзоланди.
Мазкур меморандум икки давлат илмий-тадқиқот муассасалари ўртасидаги ўзаро ҳамкорлик алоқаларини янада мустаҳкамлаш, жаҳон сивилизацияси ривожига улкан ҳисса қўшган аждодлармизнинг илмий меросини кенг тарғиб этишда муҳим платформа вазифасини бажаради.
Анжуманда Комилжон Шермухамедов "Аждодлар мероси – маърифат зиёси", Шаҳзод Исламов "Ал-Қироат-у халфал-имам" асари Имом Бухорийнинг фиқҳий қарашларининг ифодаси сифатида" мавзуларида маъруза билан иштирок этдилар.
