Жорий йилнинг 29-октябр куни Махачкала шаҳрида "Мусулмон уламолари мероси: маънавий-ахлоқий қадриятларни мустаҳкамлаш ҳамда маърифат
ғояларини тарғиб қилиш" мавзусидаги В халқаро илмий-амалий конференсия ўз ишини бошлади.
Анжуман Доғистон Республикаси Муфтияти, Доғистон гуманитар институти ҳамда Ислом маданияти, илм-фан ва таълимни қўллаб-қувватлаш фонди ҳамкорлигида ташкил этилган бўлиб, унда Имом Мотуридий халқаро илмий-тадқиқот маркази вакиллари А.Тажийев ва З.Фахриддинов иштирок этмоқда.
Конференсия доирасида мусулмон илоҳиётшунослари илмий меросининг замонавий жамиятда маънавий-ахлоқий қадриятларни мустаҳкамлашда тутган ўрни, шунингдек, ушбу меросни кенг жамоатчиликка етказишнинг филологик ва медиакоммуникатив жиҳатлари муҳокама қилинади.
Имом Мотуридий халқаро илмий-тадқиқот маркази вакилларининг мазкур нуфузли халқаро тадбирда иштирок этиши Ўзбекистон ва Россия ўртасида маданий -маърифий соҳадаги ҳамкорликни янада мустаҳкамлаб, икки томонлама илмий ва маданий алоқаларни янги босқичга кўтаришга хизмат қилади.
