Yangiliklar
O‘zbekiston delegatsiyasining Indoneziyaga tashrifi OAV diqqat markazida: "Mo‘tabar tashrif" tafsilotlari
O‘zbekiston delegatsiyasining Indoneziyaga amalga oshirgan xizmat safari Indoneziya ommaviy axborot vositalarining katta e’tiborini tortdi. Xususan, aswajatv.id hamda aspirasinusantara.id saytlarida tashrifga bag‘ishlangan yangiliklar e’lon qilindi.
Maqolalarda qayd etilishicha, O‘zbekiston delegatsiyasi Jakarta shahrida joylashgan Indoneziyaning eng yirik islomiy tashkiloti — "Nahdlatul ulamo" (PBNU) Boshqaruv kengashida uchrashuv o‘tkazildi.
Uchrashuvda Din ishlari bo‘yicha qo‘mita raisining birinchi o‘rinbosari D.Maxsudov, O‘zbekistonning Indoneziyadagi Favqulodda va Muxtor Elchisi O.Eshonov, Imom Buxoriy xalqaro ilmiy-tadqiqot markazi direktori Sh.Ziyodov, Imom Moturidiy xalqaro ilmiy-tadqiqot markazi direktor o‘rinbosari Sh.Islomov, O‘zbekiston xalqaro islomshunoslik akademiyasi prorektori I.Daminov va Imom Termiziy xalqaro markazi direktori o‘rinbosari K.Jamahmatov ishtirok etdi. Indoneziya tomondan esa "Nahdatul ulamo" tashkiloti Boshqaruv kengashi a’zolari, Sharif Hidoyatulloh universiteti rahbariyati qatnashdi.
Garvard universiteti dinshunoslik yo‘nalishi bitiruvchisi, Islom ilohiyotining rivojlanish bo‘yicha mutaxassis Ulil Abshar Abdalla O‘zbekiston delegatsiyasini qabul qilishdan juda mamnun ekanini bildirib ushbu uchrashuvni "mo‘tabar tashrif" deb atadi. Ulil Absharning so‘zlariga ko‘ra, Imom Moturidiyning g‘oyalari "Nahdatul ulamo" tashkilotining diniy asosini tashkil etadi. Bu g‘oyalar mo‘tadil, inklyuziv va mahalliy madaniyatga mos keladigan yondashuvga asoslanadi.
Delegatsiya tashrifi nafaqat Indoneziya musulmon jamoalari bilan do‘stlik rishtalarini mustahkamlash, balki O‘zbekistondagi tarixiy qadamjolarga ziyoratni tashkil etishda hamkorlikni yo‘lga qo‘yish maqsadini ko‘zlagani bilan ham ahamiyatlidir.
Uchrashuv yakunida Ulil Abshar islomshunoslik sohasidagi o‘zbekistonlik tadqiqotchilarga Ulamolar Kengashi ta’lim muassasalarida maxsus stipendiyalar ajratish taklifini bildirdi. Bu esa ikki davlat o‘rtasidagi ta’lim va ilmiy-ma’rifiy almashinuvlarni yanada kengaytirish uchun yangi imkoniyatlar eshigini ochadi.
