Masjidul haromga ko‘zi ojizlar uchun elektron Qur’on olib kelindi

Ko‘zi ojiz va zaif ko‘ruvchi musulmonlarga yordam berish maqsadida Masjidul haromga elektron Qur’on keltirildi, deya xabar bermoqda ArabNews.

Haramain deb ataluvchi elektron Qur’onda ilg‘or Brayl texnologiyasidan foydalangan. Uning uzunligi qariyb olti va kengligi to‘rt dyuym bo‘lib, yuqori sifatli Brayl yacheykalari yordamida sahifadan sahifaga muammosiz o‘tish imkonini beradi.

“Ko‘zi ojizlar uchun mo‘ljallangan 100 ta Brayl alifbosidagi elektron qurilmalar uchun maxsus javonlar tayyorlanmoqda”, – dedi Ikki muqaddas masjid ishlari bo‘yicha bosh boshqarma vakili G‘ozi al-Tubyoniy.

Yangi qurilmalardan tashqari Masjidul haromda Qur’onning Brayl alifbosidagi qog‘oz nusxalari ham taqdim etilgan.

“Har bir Mushaf olti jilddan iborat. Shuningdek, bizda ko‘zi ojiz bolalar uchun islom asoslarini o‘rganishga yordam beradigan Brayl alifbosidagi bukletlar ham bor”, – dedi G‘ozi al-Tubyoniy.

Manba:muslim.uz