17 noyabr Imom Moturidiy ziyoratgohi ochilgan kun.

Movarounnahrda kalom ilmining rivojlanishida “Hidoyat yo‘li imomi”, “Mutakallimlar imomi” kabi nomlar bilan shuhrat qozongan alloma Abu Mansur Moturidiyning o‘rni nihoyatda katta bo‘lgan.

U yashagan davrda (IX asrning oxiri – X asrning birinchi yarmi)  bu hududda to‘g‘ri yo‘ldan adashgan turli  firqalar ko‘payib, noto‘g‘ri aqidaviy qarashlar shakllana boshladi.

Mana shunday murakkab sharoitda Imom Moturidiy ularning noto‘g‘ri aqidaviy qarashlariga nisbatan asosli raddiyalar berdi.

Hanafiya mazhabi asosida o‘ziga xos kalom maktabini yaratdi.

U asos solgan moturidiylik ta’limoti butun islom olamiga tarqalib, sunniylikdagi ikki yirik maktabning biri sifatida tanildi.

1999 yil 9 dekabrdagi Vazirlar Mahkamasining "Imom Abu Mansur Moturidiy tavalludining 1130 yilligini nishonlash to‘g‘risida"gi qaroriga muvofiq 2000 yil 17 noyabrda Samarqand shahridagi Chokardiza qabristonida allomaning maqbarasi va  ziyoratgoh barpo etildi.