ANQARA MILLAT KUTUBXONASI

Millat kutubxonasini tashkil etish bo‘yicha ishlar Turkiya Prezidenti Rajab Toyyib Erdo‘g‘on rahbarligida 2015 yilda boshlangan. Kutubxonaning ochilish marosimi 2020 yil fevralda bo‘lib o‘tgan va unda O‘zbekiston Respublikasi Prezidenti Shavkat Mirziyoev ham qatnashgan. 

Kutubxona 125 000 m² maydonda joylashgan bo‘lib, bir vaqtning o‘zida 5500 kitobxonga xizmat ko‘rsata oladi. Kutubxonada 100 dan ortiq mamlakatlardan keltirilgan 134 tildagi kitoblar va nashrlar jamlangan. Jami bosma nashrlar soni 4 million bo‘lib, ulardan 2 millioni kitob, qolgan 2 millioni esa davriy nashrlar hisoblanadi. Shuningdek, kutubxonadan 210 million maqola va tezislarni hamda 665 ming elektron kitoblarni ham topish imkoni mavjud.

Millat kutubxonasi Turkiyadagi eng yirik kutubxona bo‘lib, o‘zining fondlari va xizmatlari bo‘yicha dunyodagi sanoqli kutubxonalar qatoriga kirishni maqsad qilgan.

Kutubxonaning eng yirik Jihannumo zalida 200 ming kitob mavjud. Zaldagi 16 ta ustun tarixdagi 16 turk davlati ramzi sanaladi. Zal gumbazidan Alaq surasining “U qalam bilan ilm o‘rgatgandir. U insonga bilmagan narsasini o‘rgatdi” oyatlari o‘rin olgan.

Kutubxona fondi Turkiyadan va xorijdan turli shaxsiy kolleksiyalar hamda doimiy ravishda qo‘shilib borayotgan resurslar hisobiga ko‘payib, boyib bormoqda. Kutubxonada O‘zbekistondan keltirilgan kitoblar uchun maxsus O‘zbekiston burchagi ham tashkil qilingan.

Kitobxonlarning kutubxona ichida kitoblardan foydalanishlari, nusxa olishlari, ma’lumotlar bazasiga kirishlari va hokazolar uchun kutubxona a’zoligi talab qilinadi.