Yozgi maktab safari doirasida Malayziya xalqaro islom universiteti vakillari bilan uchrashuv o‘tkazildi

O‘zbekiston xalqaro islom akademiyasi professor-o‘qituvchi va talabalari Singapur ­– Malayziya – Indoneziya mamlakatlarida tashkil etilgan yozgi maktab safari doirasida Malayziya xalqaro islom universitetiga tashrif buyurishdi.

Vakillarimizni Malayziya xalqaro islom universiteti prorektori, professor Ahmad Farish Ismoil kutib oldi. Mehmonlarni universitetda ko‘rib turganidan mamnunligini bildirdi.  

Shundan so‘ng ikki oliy ta’lim muassasasi vakillari ishtirokida uchrashuv o‘tkazildi. Unda O‘zbekiston xalqaro islom akademiyasi prorektori Salim Dusanov, Malaka oshirish va qayta tayyorlash markazi direktori Xusniddin Axmedov, Magistratura bo‘limi boshlig‘i Ashirali Abdirashidov hamda delegatsiya a’zolari ishtirok etdi.

Delegatsiyamiz a’zolari Akademiya faoliyati, maqsad va vazifalari, yaqin istiqboldagi rejalari, ziyorat turizmi bo‘yicha amalga oshirilayotgan ishlar, Akademiya huzurida faoliyat yuritayotgan markazlar to‘g‘risida, shuningdek, Akademiyaning xalqaro hamkorlik faoliyati bo‘yicha qilinayotgan ishlar, xorijiy hamkor tashkilotlar bo‘yicha batafsil ma’lumot berishdi.

Samimiy muloqot davomida Malayziya xalqaro islom universiteti vakillari o‘zaro hamkorlik aloqalari rivojlanib borayotganidan mamnun ekanliklarini bildirdi. Universitet kutubxonasiga ekskursiya tashkil etildi. 

Shuningdek, Akademiya professor-o‘qituvchilari ishtirokida turizm mavzusiga bag‘ishlangan seminarlar o‘tkazildi. Yakunda Akademiya vakillariga universitet rahbariyati tomonidan sertifikatlar topshirildi.

Uchrashuv yakunida Akademiya vakillari universitet faxriy mehmonlari kitobiga esdalik so‘zlarini yozib qoldirishdi. 

Samimiy va samarali o‘tgan uchrashuv uchun o‘zaro minnatdorlik izhor etishdi.