“MOTURIDIYLIK VA HOZIRGI ZAMON” MAVZUIDAGI TURKUM ILMIY SYEMINARLAR BOSHLANDI
Avval xabar qilganimizdek, Imom Moturidiy xalqaro ilmiy-tadqiqot markazi Bosh ilmiy xodimi, doktor Ahmad Sa’d Damanhuriy Imom Buxoriy xalqaro ilmiy-tadqiqot markazida “Moturidiylik va hozirgi zamon” mavzuidagi xalqaro ilmiy seminarlar haftaligida o‘z ma’ruzalari bilan ishtirok etmoqda.
12 avgust kuni doktor Ahmad Sa’d Damanhuriy Markaz ilmiy xodimlari bilan “Imom Moturidiy qarashlarining ilmiy ahamiyati” mavzuida davra suhbati o‘tkazdi. Tadbir davomida Moturidiyning hayoti va merosi haqida qimmatli ma’lumotlar aytib o‘tildi.
– Imom Moturidiy Injil, Tavrot kitoblarining ham bilimdoni, tafsir, kalom, fiqh, tasavvuf, falakiyot va tarix sohalarida ham mukammal ilmga ega bo‘lgan. U islom olamida eng ko‘p sharafli unvonlar bilan ulug‘langan yagona olimdir. O’z davridagi ulamolar orasida Moturidiyning obro‘-e’tibori juda yuqori bo‘lgan. Unga bejiz “Barcha hanafiy olimlar raisi” unvoni berilmagan. Moturidiy ijtihodda ham eng baland martabaga ko‘tarilgan olim, ilmu amalda barchaga o‘rnak bo‘lgulik sharafli inson edi, – deb ta’kidladi Damanhuriy.
Tadbir so‘nggida ilmiy xodimlar Moturidiylik ta’limotiga oid o‘zlarini qiziqtirgan savollariga javob oldi.
Ahmad Sa’d Damanhuriy kunning ikkinchi yarmida Samarqand shahridagi tarixiy obidalarni ziyorat qildi, Samarqand qog‘ozini ishlab chiqarish jarayoni bilan tanishdi.
Imom Buxoriy xalqaro ilmiy-tadqiqot markazi
Matbuot xizmati
Izohlar