“Sulton Yildirim Boyazid va Amir Temur” mavzusidagi xalqaro simpozium
Imom Moturidiy xalqaro ilmiy-tadqiqot markazi direktori, tarix fanlari bo‘yicha falsafa doktori (PhD) Jamoliddin Karimov Samarqand davlat universiteti, Turkiya Respublikasining Anqara Yildirim Boyazid hamda Uludag‘ universitetlari hamkorligida joriy yilning 17-26 oktabr kunlari o‘tkazilayotgan “Sulton Yildirim Boyazid va Amir Temur” mavzusidagi xalqaro simpozium doirasida Turkiya Respublikasida bo‘lib turibdi. Jumladan, Uludag‘ universitetida davom ettirilgan simpozium ishida “Temuriylar davri allomasi al-Jazariyning qiroat va uning ko‘rinishlari haqida qarashlari” mavzusidagi ma’ruza bilan hamda sho‘ba moderatori sifatida ishtirok etdi. Simpoziumda Sulton Yildirim Boyazid hamda Amir Temurning siyosiy faoliyati, ularning jahon ilm-fani va madaniyati rivojiga qo‘shgan hissalariga oid ilmiy masalalar keng muhokama qilindi.
Shu bilan birga, Bursa shahri Uludag‘ universitetida tashkil qilingan simpozium doirasida Imom Moturidiy “Ta’vilot al-Qur’on” asari 29-juzining Imom Moturidiy xalqaro ilmiy-tadqiqot markazida amalga oshirilgan o‘zbek tilidagi tarjimasi taqdimoti ham o‘tkazildi. Taqdimotda ishtirok etgan xorijlik olim va mutaxassislar ushbu tarjimani jahon moturidiyshunosligida amalga oshirilgan yirik fundamental tadqiqot sifatida e’tirof etib, yuqori baho berdilar.
Izohlar