Olma-ota shahrida “Yangi Markaziy Osiyo uchun istiqbollar: barqaror va demokratik jamiyatni shakllantirishda dinning roli” mavzuida xalqaro konferensiya bo‘lib o‘tdi

2022 yil 7-8 sentabr kunlari Qozog‘iston Respublikasining Olma-ota shahrida “Yangi Markaziy Osiyo uchun istiqbollar: barqaror va demokratik jamiyatni shakllantirishda dinning roli” mavzuida xalqaro konferensiya o‘tkazildi.

Konferensiyada AQSh, Avstraliya, Avstriya, Rossiya, Pokiston, Ozarbayjon, Qirg‘iziston, Tojikiston kabi mamlakatlardan ko‘zga ko‘ringan olim va mutaxassislar ishtirok etdilar.

Jumladan, unda ishtirok etgan Din ishlari bo‘yicha qo‘mita, O‘zbekiston xalqaro islom akademiyasi xodimlari, xususan, Imom Moturidiy xalqaro ilmiy-tadqiqot markazi Zamonaviy islom tadqiqotlari bo‘limi boshlig‘i Zafar Faxriddinov anjuman ishtirokchilarini yurtimizda diniy-ma’rifiy sohada olib borilayotgan tizimli va jadal islohotlar bilan yaqindan tanishtirdilar. Diniy bag‘rikenglikni ta’minlashdagi O‘zbekiston tajribasi anjuman tashkilotchilari va qatnashchilari tomonidan yuksak baholandi. O‘zbekiston bu borada qo‘shni davlatlardan ancha oldinda ekani e’tirof etildi.

Konferensiya ishi ikki kun davom etdi. Birinchi kuni mutaxassislar tomonidan tajovuzkor ekstremizm va unga qarshi kurash chora-tadbirlari, milliy xavfsizlik, diniy erkinlik, din va fuqarolik jamiyati, barqaror hamda demokratik Markaziy Osiyo mamlakatlarining diniy sohada olib borayotgan siyosati, ko‘p millatli hamda ko‘p dinli jamiyatda konfessiyalararo muloqotni rivojlantirish sohasida o‘zaro tajriba almashishni yo‘lga qo‘yish, diniy erkinlik sohasida qonun ustuvorligini ta’minlash, turli din vakillari o‘rtasida o‘zaro ishonch hamda hurmat tuyg‘ularini mustahkamlash kabi dolzarb va muhim masalalar muhokama qilindi.

8 sentabr kuni konferensiyaning yakuniy qismi bo‘lib o‘tdi. Unda ilmiy-amaliy ma’ruzalar sarhisob qilinib, e’tiqod erkinligi hamda dinlararo muloqotni ta’minlash bo‘yicha fikr almashildi, shuningdek, kelgusidagi o‘zaro hamkorlik istiqbollari belgilab olindi.   

Mazkur konferensiya turli din vakillari e’tiqod erkinligini yanada mustahkamlash, inson huquq va erkinliklarini xalqaro miqyosda yanada faol targ‘ib etishda katta ko‘mak berishi shubhasiz.