YANGI NASHR

O‘zbekiston Respublikasi Prezidentining 2020 yil 11 avgustdagi “Imom Moturidiy xalqaro ilmiy-tadqiqot markazini tashkil etish chora-tadbirlari to‘g‘risida”gi qarorda Imom Moturidiy hayoti va ilmiy merosiga bag‘ishlangan badiiy asarlar yaratishni rag‘batlantirish, Imom Moturidiy va moturidiylik ta’limoti davomchilari sanalgan olimlar haqida badiiy asarlar yaratish bo‘yicha bir qator vazifalar belgilangan. Ushbu vazifalar ijrosini ta’minlash maqsadida O‘zbekiston Yozuvchilari uyushmasi tomonidan “Imom Moturidiy” romani nashr etildi.

Luqmon Bo‘rixon qalamiga mansub ushbu romanda olis X asr boshlaridagi ko‘hna Samarqandning siyosiy-ijtimoiy, ma’rifiy hayotidan ayrim lavhalar o‘rin olgan. Yozuvchi Ulug‘ ajdodlarimizdan biri, mashhur alloma Abu Mansur Moturidiyning badiiy siymosini aks ettirishga urinadi. Asar dramatik voqealarga, qiziqarli, sermazmun bahs-munozaralarga boy bo‘lib, Moturiiy hazratlari haqidagi o‘zbek tilidagi ilk roman hisoblanadi. 

Ushbu kitob buyuk vatandoshimiz hayoti va sermazmun ijodi bilan yaqindan tanishishda muhim manba bo‘lib xizmat qilishiga ishonamiz.