Toshkent islom instituti va Imom Moturidiy xalqaro ilmiy-tadqiqot markazi o‘rtasida anglashuv memorandumi imzolandi

Bugun, 2021 yil 10 may kuni Toshkent islom institutida Imom Moturidiy xalqaro ilmiy-tadqiqot markazi hodimlari va institut professor-o‘qituvchilari ishtirokida markaz faoliyati va istiqboldagi rejalari mavzuida ilmiy amaliy konferensiya bo‘lib o‘tdi.

Konferensiyada, Imom Moturidiy xalqaro ilmiy-tadqiqot markazi faoliyatiga bag‘ishlangan taqdimot bo‘lib o‘tdi, ilmiy tadqiqot olib borishning uslubiyatlari bo‘yicha master-klass tashkil etildi hamda markaz va TII o‘rtasida anglashuv memorandumi imzolandi.

Imom Moturidiy xalqaro ilmiy-tadqiqot markazi direktori D.Maqsudov markazi va uning faoliyati haqida taqdimot qilib berdi. Taqdimotdan so‘ng Toshkent islom instituti va Moturidiya xalqaro ilmiy-tadqiqot markazi o‘rtasida o‘zaro anglashuv memorandum imzolandi.

Memorandumga ko‘ra markaz va institut o‘rtasidagi hamkorlik quyidagilarni o‘z ichiga oladi:

Aqida, islom falsafasi, manbalari, moturidiylik ta’limotini o‘rganish bo‘yicha o‘zaro hamkorlikni yo‘lga qo‘yish;
Ilmiy axborot almashish va kutubxonalar o‘rtasida hamkorlik olib borish;
Hamkorlikda ilmiy-tadqiqot ishlarini olib borish;
Akademik, ilmiy-tadqiqot loyihalarida ishtirok etish;
Qo‘shma ilmiy konferensiyalar, seminarlar va simpoziumlar o‘tkazish;
Hamkorlik doirasida kitoblar, tadqiqot ishlari, davriy nashrlar va boshqalarni chop etishni yo‘lga qo‘yish;
Ilmiy tadqiqot ishlariga ilmiy rahbarlik bo‘yicha va ilmiy izlanishlarda tajriba almashish;
Moturidiylik jurnalida maqolalar chop etishda hamkorlik qilish.

Shu kabi amaliy ishlar natijasida markaz va institut o‘rtasidagi doimiy hamkorlik yuqori bosqichga chiqib, diniy-ma’rifiy sohadagi harakatlar ilmiy jihatdan yanada rivojlanadi. Toshkent islom instituti professor-o‘qituvchilari ham dolzarb mavzularda ilmiy-tadqiqotlar olib borib, institutning ilmiy tarkibini yaxshilab, diniy ta’lim tizimi salohiyatini oshirishga xizmat qiladi.