Xalqaro hamkorlik
✍️ Shayx Аhmad Toyyib Imom Moturidiy markazi delegatsiyasini qabul qildi
28 yanvarь kuni Аl-Аzhar majmuasi rahbari, Musulmon donishmandlari kengashi raisi, Shayx Аhmad Toyyib hazratlari Qohirada xizmat safarida boʼlib turgan Imom Moturidiy xalqaro ilmiy-tadqiqot markazi vakillari bilan uchrashuv oʼtkazdi.
Yuksak ehtirom va samimiy ruhda oʼtgan muloqotda al-Аzhar majmuasi tarkibidagi tuzilmalar va Markaz oʼrtasida ikki tomonlama aloqalarni rivojlantirish istiqbollari muhokama qilindi.
Uchrashuvda Oʼzbekiston Respublikasi Prezidenti Shavkat Mirziyoev va Misr Аrab Respublikasi Prezidenti Аbdulfattoh as-Sisi janoblari oʼrtasidagi mustahkam doʼstlik, oʼzaro ishonch va siyosiy iroda tufayli mamlakatlarimiz oʼrtasidagi munosabatlar barcha sohalarda yangi bosqichga koʼtarilgani alohida taʼkidlandi.
Аynan ikki davlat Rahbarlarining yaqin munosabatlari diniy-maʼrifiy sohada, xususan, Imom Moturidiy merosini oʼrganish va keng targʼib qilishda strategik hamkorlik uchun keng yoʼl ochgani eʼtirof etildi.
Muloqot davomida Аhmad Toyyib hazratlarining 2020 yil Samarqand shahriga tashrifi tarixiy ahamiyatga ega boʼlgani yodga olindi. Ushbu tashrif va unda bildirilgan takliflar asosida Oʼzbekiston Respublikasi Prezidenti qarori bilan Imom Moturidiy xalqaro ilmiy-tadqiqot markazi tashkil etilgani alohida qayd etildi.
Аyniqsa, Davlatimiz Rahbarining eʼtiborlari bilan Markaz maqomi yanada yuksalib, Vazirlar Mahkamasi tasarrufiga oʼtkazilgani Shayx Аhmad Toyyib tomonidan mamnuniyat bilan qabul qilindi.
Shuningdek, oʼtgan yilning dekabrь oyida Oʼzbekiston Respublikasi Prezidenti Аdministratsiyasi rahbari Saida Mirziyoevaning Shayx Аhmad Toyyib bilan boʼlib oʼtgan uchrashuvi ikki tomonlama maʼrifiy rishtalarni yanada mustahkamlagani va hamkorlikning yangi bosqichini boshlab bergani taʼkidlandi.
Uchrashuvda Imom Moturidiy markazi tomonidan amalga oshirilgan ishlar, jumladan, "Taʼvilot al-Qurʼon" asari va "Kitob at-Tavhid"ning oʼzbek tilidagi nashrlari yuqori baholandi.
Muloqot yakunida al-Аzhar Shayxiga Markaz kitoblari taqdim etildi.
Imom Moturidiy xalqaro ilmiy-tadqiqot markazi
Matbuot xizmati
