Академия вакилларининг ёзги мактаб сафари давом этмоқда

Ўзбекистон халқаро ислом академияси профессор-ўқитувчи ва талабаларининг Сингапур ­– Малайзия – Индонезия мамлакатларидаги ёзги мактаб сафари доирасидаги навбатдаги манзили Малайзиянинг Перлис штати бўлди.

Сафар дастурига биноан Перлис ислом университети вакиллари билан учрашув ўтказилди. Унда Ўзбекистон халқаро ислом академияси проректори Салим Дусанов, Малака ошириш ва қайта тайёрлаш маркази директори Хусниддин Ахмедов, Магистратура бўлими бошлиғи Аширали Абдирашидов, Имом Мотуридий маркази мутахассиси Шукрулло Жўраев ҳамда делегация аъзолари иштирок этишди.

Учрашувда Академия ҳақида маълумотлар, унинг фаолияти, мақсад ва вазифалари, яқин истиқболдаги режалари, зиёрат туризми бўйича амалга оширилаётган ишлар, Академия ҳузурида фаолият юритаётган марказлар тўғрисида, шунингдек, Академиянинг халқаро ҳамкорлик фаолияти бўйича қилинаётган ишлар, хорижий ҳамкор ташкилотлар бўйича батафсил маълумот берилди.

Суҳбат давомида Перлис ислом университети проректори ва Бизнес факултети декани яқиндан алоқалар ўрнатиш бўйича катта қизиқиш билдирди. Жумладан, ўзаро профессор-ўқитувчилар, талабалар алмашинуви, онлайн учрашувлар ташкиллаштириш, уларнинг талабаларини Ўзбекистоннинг қадимий шаҳарларига саёҳатини ташкиллаштириш каби масалаларга алоҳида эътибор қаратилди.

Учрашув якунида ҳамкорларга Академиянинг эсдалик совғаси ҳамда Зиё медиа маркази томонидан тайёрланган Ўзбекистон зиёрат туризми бўйича филмларнинг электрон нусхалари тақдим этилди.

Икки томон самимий ва самарали ўтган учрашув учун ўзаро миннатдорлик изҳор этишди.

Манба: iiau.uz