Ҳаким Термизийнинг Қуръон тафсирига бағишланган илк асари топилди ва нашр этилди

Тасаввуф ва тафсир илми ривожига салмоқли ҳисса қўшган қомусий олим Ҳаким Термизийнинг Қуръон тафсирига бағишланган илк асари бугунгача “йўқолган” деб келинар эди.

Имом Термизий халқаро илмий-тадқиқот маркази катта илмий ходими, тарих фанлари бўйича фалсафа доктори Жўрабек Чўтматовнинг изланишлари самараси ўлароқ ушбу асар қўлёзмаси Туркиянинг Бурдур шаҳридан топилди ва у нашрга тайёрланди.

Дунё тадқиқотчилари эътиборига ҳавола этиш мақсадида асар араб тилида Истанбул шаҳридаги “Дор ал-кутуб-арабия” нашриётида “Баҳр ат-тафсир” (“Тафсир уммони”) номи билан чоп этилди. Асарни ўзбек тилида ҳам нашр этиш кўзда тутилган.  

Маълумот учун. Ҳаким Термизий (820-932) 400 дан ортиқ китоб ёзган бўлиб, улардан олтмишга яқини бизгача етиб келган. Алломанинг асарлари Париж, Қоҳира, Дамашқ, Искандария, Истанбул ва Лондон каби шаҳарлардаги қўлёзмалар жамғармаларида сақланади.  

Жонибек ҚЎЗИМУРОДОВ(сурат),ЎзА