ИСТАНБУЛ УНИВЕРСИТЕТИ ПРОФЕССОРЛАРИ МАРКАЗГА ТАШРИФ БУЮРДИЛАР

Ҳозирги кунда Ўзбекистон  ва Туркия ўртасида бошқа соҳаларда бўлгани каби илмий тадқиқот йўналишида ҳам амалий ҳамкорлик мутлақо янги босқичга кўтарилди. 

Ушбу ҳамкорлик доирасида жорий йилнинг 23 май кунида Ўзбекистон халқаро ислом академияси ҳамда Туркиянинг Истанбул университети ўртасида имзоланган Erasmus+KA107 алмашинув дастури буйича таклиф этилган Илоҳиёт факултети профессорлари Мерве Озайкал ва Али Кайханлар Имом Мотуридий халқаро илмий-тадқиқот маркази фаолияти билан яқиндан танишиш учун ташриф буюрдилар. Меҳмонларни марказ директори Жамолиддин Каримов кутиб олди.

Ташриф мобайнида профессор ўқитувчилар марказ фаолияти, илмий тадқиқот натижалари, таржима жараёнлари, нашр этилган китоблар билан яқиндан танишдилар. Хусусан марказнинг сўнги нашрлари бўлмиш Таъвилот ал- Қуръон асарининг 27-28, 25-26 жузлари, Китоб ат-Тавҳид ва бошқа кўплаб асарларнинг илмий тадқиқот натижалари ҳамда таржима жараёнларини юксак эътироф  этдилар.

Шунингдек хорижий меҳмонларга Марказ томонидан нашр этиладиган Мотуридийлик журнали тўғрисида ҳам маълумотлар тақдим этилди. 

Хорижлик профессор ўқитувчилар самимий қабул учун миннатдорлик билдириб, Марказда илмий фаолият олиб бориш учун яратилган шароитлар кўламига ижобий баҳо берди.

Имом Мотуридий халқаро илмий-тадқиқот маркази 
Матбуот хизмати