Ўзбек қорилари АҚШда

Имом Мотуридий халқаро илмий-тадқиқот маркази илмий ходими Абдураҳмонов Ихтиёр ва Тошкент Ислом институти ўқитувчиси Рашидов Аҳмадхонлар Рамазон ойи билан боғлиқ тадбирларда иштирок этиш мақсадида АҚШнинг Флорида штатида жойлашган Орландо шаҳридаги “Ал-Бухорий” ислом марказига сафар қилдилар.

Бир ой давом этадиган сафар мобайнида АҚШда истиқомат қилаётган ватандошларимиз учун диний-маърифий мазмундаги суҳбатлар, маънавий-маърифий тадбирлар ўтказилиши режалаштирилган.

Марказ томонидан нашр қилинган китоблар, жумладан, Имом Мотуридий “Таъвилот ал-Қуръон” асарининг 29-, 28–27-жузларининг ўзбек тилидаги илмий-изоҳли таржимаси, Абул Муин Насафийнинг “Баҳр ал-калом” ва “Абу Мансур Мотуридий” номли тарихий роман “Ал-Бухорий” ислом маркази кутубхонасига тақдим қилинди. Таъкидлаш лозимки, мазкур китоблар ватандошларимиз томонидан катта қизиқиш билан қарши олинди.

Имом Мотуридий халқаро илмий-тадқиқот маркази 
Матбуот хизмати