Ўзбекистон халқаро ислом академияси ректори халқаро форумда иштирок этди

Пойтахтимизда “15 октябр – Халқаро қишлоқ аёллари куни” муносабати билан “Қишлоқ ҳудудларида аёллар тадбиркорлигини ривожлантириш истиқболлари ва аҳолининг озиқ-овқат хавфсизлигини таъминлашдаги иштироки” мавзусида халқаро форум ўтказилди.

Тадбирда хотин-қизларнинг жамиятдаги ролини ошириш, айниқса, чекка қишлоқларда истиқомат қилаётган аёллар турмуш шароитини яхшилаш, уларнинг муаммоларига ҳамда озиқ-овқат хавфсизлигини таъминлашга эътибор қаратиш, қишлоқ жойларда хотин-қизларни тадбиркорликка жалб этиш учун яратилган имконият ва шарт-шароитлар борасида сўз борди.

Форумда Олий Мажлис Сенати Раиси, Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси раиси Танзила Нарбаева ҳамда Ўзбекистон Республикаси Президентининг жамоат ва диний ташкилотлар билан ҳамкорлик масалалари бўйича маслаҳатчиси, Ўзбекистон халқаро ислом академияси ректори Музаффар Комилов, халқаро экспертлар, мутахассислар иштирок этди.

Форумда сўзга чиққанлар иштирокчилар эътиборини хотин-қизларнинг бандлик масаласига қаратиб, қишлоқ ҳудудларида аёлларимиз орасида норасмий секторда банд бўлганлар кўпчиликни ташкил этаётгани, уларнинг расмий бандлигини таъминлаш жиддий масала эканини, бу ўз ўрнида уларнинг муносиб ҳақ олиши, ишончли ижтимоий ҳимояси ва пенсия таъминотини янада яхшилашга хизмат қилишини алоҳида қайд этишди.

Шунингдек, тадбир иштирокчилари қишлоқ ҳудудларининг ижтимоий-иқтисодий юксалишида, хусусан, аграр соҳада мамлакатимиз экспорт салоҳияти ва саноатини юксалтиришда хотин-қизларнинг роли, қишлоқ аёлларининг соғлиғини мустаҳкамлаш, оналик ва болалик муҳофазаси ва ижтимоий ҳимоясига оид амалга оширилаётган ишлар ва истиқболдаги режаларни муҳокама қилишди.

Ўзбекистон халқаро ислом академияси
Матбуот хизмати