Имом Мотуридий “Таъвилот ал-Қуръон” асарининг 29 жузи ҳамда “Имом Мотуридий” романи тақдимоти ўтказилди

2022 йил 14 октябр куни Ўзбекистон халқаро ислом академиясида профессор-ўқитувчилар ва талабалар учун Имом Мотуридий қаламига мансуб “Таъвилот ал-Қуръон” асарининг 29 жузи ҳамда “Имом Мотуридий” романининг тақдимотлари ўтказилди. 

Тақдимотда Ўзбекистонда хизмат кўрсатган маданият ходими, “Имом Мотуридий” романининг муаллифи Луқмон Бўрихон, Академия профессор-ўқитувчилари, талабалар ҳамда Марказ ходимлари иштирок этдилар. 

Тақдимотни Имом Мотуридий илмий-тадқиқот маркази раҳбари Жамолиддин Каримов очиб берди. Тақдимотда сўзга чиққанлар Имом Мотуридийнинг илмий-маънавий мероси, мотуридийлик таълимоти ҳамда унинг бугунги кундаги аҳамияти хусусида тўхталиб ўтдилар. Шундан сўнг йиғилганларга “Таъвилот ал-Қуръон” асари таржимасининг ўзига хос хусусиятлари, унинг бугунги кунда жамиятда кузатилаётган айрим ихтилофли ақидавий масалаларга ечим топиш ҳамда мўътадил таълимотни кенг тарғиб қилишдаги амалий аҳамияти ҳақида маълумот берилди. 

Буюк аждодларимиз меросини оммабоп қилиб халқимизга етказиш билан бир қаторда, Президентимиз ишончини оқлашдек юксак масъулиятни бажара олган эркин ижодкорлардан бири Луқмон Бўрихон тақдимотдаги нутқида мазкур роман мотуридийлик таълимоти бўйича яратилаётган илк бадиий асарлар сирасига киришини, бундайин баддий тўқималарга бой асарлар нафақақат бугунги кун ёшларига, балки келгуси ёш авлодларига ҳам ўлмас манба бўлишини алоҳида такидлади. Муаллифнинг романни яратиш жараёнидаги мулоҳазалари, таассуротларини талабалар билан ўртоқлашгани ёш китобхонларда ўзгача қизиқиш ва асар мутолаасига иштиёқлари янада уйғонишига сабаб бўлди. Тадбир сўнгида ўтказилган қизиқарли викторина ва қизғин савол-жавоблар  тақдимот маросимига янада кўтаринкилик бахш этди.

Баҳс-мунозаларда ғолиб бўлган талабаларга марказ томонидан тайёрлаб қўйилган “Таъвилот ал-Қуръон”нинг  29 жузи, “Имом Мотуридий” романи ҳамда марказнинг махсус эсдалик совғалари топширилди.