ТУРКИЯ МИЛЛИЙ КУТУБХОНАСИ

Туркия Республикасидаги энг йирик кутубхоналаридан бири ҳисобланган Туркия Миллий кутубхонаси пойтахт Анқара шаҳрида жойлашган бўлиб, 1946 йилда ташкил этилган ва ўз фаолиятини 1948 йилда бошлаган. Кутубхона Маданият ва Туризм вазирлиги тасарруфига киради. Миллий кутубхона биноси қурилиш ишлари узоқ вақт давом этган. Ҳозирги бино кўриниши 1983 йилда тўлиқ шаклланган. 

Миллий кутубхонанинг вазифаси илмий-маданий тадқиқотларни амалга ошириш имконини яратиш, бу мақсадга хизмат қилиши мумкин бўлган барча асарлар ва ҳужжатларни бир жойга жамлаш, мамлакат ичидан ва хориждан келган маълумот олиш бўйича талаб ва таклифларни кўриб чиқиб, турли илмий ва маданий тадқиқотларга ёрдам беришдан иборат.

Кутубхона таркибида бешта мутолаа зали ва битта академик зал мавжуд бўлиб, улардан энг каттаси саналувчи Мужгон Жунбур зали 1200 га яқин китобхонни ўз ичига сиғдира олади.

1934 йилда қабул қилинган қонунга мувофиқ, Туркияда нашр этилган ҳар қандай асардан бир намуна Миллий кутубхонага юборилади. Ҳозирда кутубхонада 1 миллион 400 мингдан ортиқ босма ва қўлёзма китоблар мавжуд. Улардан 27 464 таси турли даврларга оид қўлёзма асарлар ҳисобланади. 2017 йилда кутутбхонага аъзо бўлганлар сони 27 минг кишини ташкил қилган.

Кутубхонада Библиографиялар, Нодир босма китоблар, Даврий нашрлар, Китоблар (босма ва қўлёзма), Отатурк ҳужжатлари, Китобдан ташқари материаллар каби бўлимлар мавжуд.