Ҳиндистонлик профессор Ўзбекистон халқаро ислом академиясида меҳмон бўлди

Ўзбекистон халқаро ислом академиясида Тошкент шаҳридаги Лал Баҳадур Шастри номидаги Ҳинд маданияти маркази директори, профессор Чандер Шекҳар билан учрашув ташкил этилди.

Унда Ўзбекистон халқаро ислом академияси Халқаро ҳамкорлик масалалари бўйича проректори Баҳромжон Мамадиев, Имом Мотуридий халқаро илмий-тақдиқот маркази директори Жамолиддин Каримов, Халқаро ҳамкорлик бўлими бошлиғи Баҳодир Хўжаев иштирок этди.

Мулоқотда ўзаро ҳамкорлик алоқаларини мустаҳкамлаш, соҳага оид илмий-амалий анжуманлар ташкил этиш, ўқитувчи ва талабалар алмашинувини йўлга қўйиш, илмий-тадқиқот ишлари натижалари билан ўзаро фикр алмашиш каби масалаларда суҳбатлашилди. 

Ўзбек ва ҳинд халқлари ўртасидаги дўстлик тарихи узоқ ўтмишга бориб тақалиши, жумладан, Буюк ипак йўли даврида халқларимиз ўртасида нафақат савдо-иқтисодий, балки маданий ва гуманитар соҳаларда ҳам яқин муносабатлар бўлгани алоҳида қайд этилди. Айниқса, илм-фан борасида эришилган ютуқлар ўз самарасини кўрсатиб, бугунги кунда ҳам ушбу соҳадаги алоқалар мунтазамлик касб этгани таъкидланди.

Самимий мулоқот давомида сўнгги йилларда юртимизда диний-маърифий соҳадаги ислоҳотлар, Ўзбекистон халқаро ислом академияси, Имом Мотуридий халқаро илмий-тадқиқот марказида яратилган шароитлар, муассасаларнинг илмий салоҳияти ҳақида маълумот берилди.

Учрашув якунида меҳмон Ўзбекистон халқаро ислом академияси раҳбариятига самимий мулоқот, ҳамкорлик алоқаларини ривожлантиришга оид таклиф ва ташаббуслар билдирилгани учун миннатдорлик билдирди. Томонлар ўзаро эсдалик совғаларини улашишди.