ЎҚИ

Қуръони каримдаги сўзлар миқдори етмиш етти мингдан ортиқни ташкил этади. Мана шу сўзларнинг улкан оқими ичида “Ўқи” сўзи энг аввал нозил бўлган сўздир...
Шунингдек, Қуръони каримда “намоз ўқинг”, “закот беринг”, “яхшиликка буюринг”, “ёмонликдан қайтаринг”, “сизга етган мусибатларга сабр қилинг”, “Биз ризқ қилиб берган нарсаларимиздан инфоқ қилинг”, “Аллоҳга тавба қилинг” мазмунидаги кўплаб буйруқлар зикр этилган. Бироқ, мана шу буйруқлар орасида энг аввал “Ўқи” деган буйруқ нозил қилинди. Қолаверса, фақатгина бир сўз билан чекланиб қолмай, илк беш оятнинг барчаси ўқиш ҳақида нозил бўлди ҳамда мазкур оятларда “Ўқи” сўзи икки маротаба зикр этилди. “Яратган Роббинг номи билан ўқи. У инсонни алақдан яратди”. Бундан сўнг “Ўқи! Роббинг карамлиларнинг карамлисидир”, дейилди. Кейин: “У, қалам билан илм ўргатгандир”, деб қалам сўзи алоҳида қайд этилди. Бу эса буйруқнинг киноя ёки бошқа мажозий маънолар ҳақида эмас, балки айнан қалам билан ёзилган нарсани ўқиш ҳақида эканини англатади.