O‘QI

Qur’oni karimdagi so‘zlar miqdori yetmish yetti mingdan ortiqni tashkil etadi. Mana shu so‘zlarning ulkan oqimi ichida “O‘qi” so‘zi eng avval nozil bo‘lgan so‘zdir..
Shuningdek, Qur’oni karimda “namoz o‘qing”, “zakot bering”, “yaxshilikka buyuring”, “yomonlikdan qaytaring”, “sizga yetgan musibatlarga sabr qiling”, “Biz rizq qilib bergan narsalarimizdan infoq qiling”, “Allohga tavba qiling” mazmunidagi ko‘plab buyruqlar zikr etilgan. Biroq, mana shu buyruqlar orasida eng avval “O‘qi” degan buyruq nozil qilindi. Qolaversa, faqatgina bir so‘z bilan cheklanib qolmay, ilk besh oyatning barchasi o‘qish haqida nozil bo‘ldi hamda mazkur oyatlarda “O‘qi” so‘zi ikki marotaba zikr etildi. “Yaratgan Robbing nomi bilan o‘qi. U insonni alaqdan yaratdi”. Bundan so‘ng “O‘qi! Robbing karamlilarning karamlisidir”, deyildi. Keyin: “U, qalam bilan ilm o‘rgatgandir”, deb qalam so‘zi alohida qayd etildi. Bu esa buyruqning kinoya yoki boshqa majoziy ma’nolar haqida emas, balki aynan qalam bilan yozilgan narsani o‘qish haqida ekanini anglatadi.