IRCICA ташкилоти директори Маҳмуд Эрол Қиличнинг китоби тақдимоти ўтказилди
Ўзбекистон халқаро ислом академиясида Туркиядаги Ислом тарихи, санъати ва маданиятини тадқиқ қилиш – IRCICA ташкилоти директори, профессор Маҳмуд Эрол Қиличнинг “Шайх-и-Акбар” номли китобининг тақдимоти бўлиб ўтди.
“Ислом тарихи ва манбашунослиги IRCICA” кафедраси томонидан ўтказилган тадбирда IRCICA Бош директори маслаҳатчиси, тарих фанлари доктори, профессор Аширбек Мўминов, Ўзбекистон халқаро ислом академияси ректори маслаҳатчиси Ўткир Ҳасанбоев, Илмий ишлар ва инновациялар бўйича проректори Зоҳиджон Исломов, Имом Мотуридий халқаро илмий-тадқиқот маркази директори Жамолиддин Каримов, Халқаро ҳамкорлик бўлими бошлиғи Баҳодир Хўжаев, кафедра профессор-ўқитувчилари, олимлар ва талабалар иштирок этди.
Мулоқотни Илмий ишлар ва инновациялар бўйича проректори Зоҳиджон Исломов очиб бериб, Академия ректори Музаффар Комиловнинг табригини етказди.
Тақдимот давомида Маҳмуд Эрол мазкур учрашувни ташкил этгани учун Ўзбекистон халқаро ислом академиясига миннатдорлик билдирди. Ислом тарихи, санъати ва маданиятини тадқиқ қилиш – IRCICA ташкилотининг мақсад-вазифаларига тўхталиб ўтди. Ташкилот томонидан чоп этилган китоблар, хусусан, “Шайх-и-Акбар” номли китоби ҳақида маълумот берди.
Профессор Маҳмуд Эрол Қилич 1961-йилда Истанбулда туғилган. 1993-йилда Туркия университетларида тасаввуф бўлимлари ташкил этилгандан сўнг у “Ибн Арабий тафаккурида борлиқ ва унинг босқичлари” (1995) номли номзодлик диссертациясини ҳимоя қилди (нашр этилган). 1998-йилда доцент, 2004-йилда эса профессор унвонига эга бўлди.
Унинг “Тасаввуф ва шеър: Усмонли тасаввуф ширин поетикаси” номли асари 2004-йилда Туркия Муаллифлар уюшмасининг Тадқиқот мукофотига сазовор бўлган ва бир қанча тилларга таржима қилинган. Ҳозиргача унинг 16 та китоби, 5 таси таржимаси, 2 таси муҳаррирлик қилган китоблари нашр этилган.
Учрашув якунида Ислом тарихи, санъати ва маданиятини тадқиқ қилиш – IRCICA ташкилоти вакиллари Ўзбекистон халқаро ислом академиясига ҳамкорлик учун миннатдорлик билдирди. Бу ҳар икки таълим муассасалари учун фойдали бўлишини таъкидлади.
Якунда икки томон вакиллари совғалар алмашишди.
Манба: iiau.uz
Изоҳлар