O‘zbekiston delegatsiyasi 2023 yil 15 mart kuni Qohira universiteti Oliy ta’limdan keyingi ta’lim fakulteti hamda Arab tili ta’limini rivojlantirish markaziga tashrif buyurdi.

Tashrif davomida Qohira universiteti Oliy ta’limdan keyingi ta’lim fakulteti dekani professor Iman Haridi bilan uchrashuv tashkil qilinib, O‘zbekiston xalqaro islom akademiyasi bilan hamkorlikda Arab tili yo‘nalishi bo‘yicha qo‘shma dasturlarni yo‘lga qo‘yish, akademiya bitiruvchilarining bitiriv malakaviy ishlari hamda magistrlik dissertatsiyalariga Qohira universiteti professor-o‘qituvchilarini ilmiy rahbar sifatida jalb qilish, xodimlar almashinuvini yo‘lga qo‘yish, xalqaro e’tirof etilgan til bilish imtihonlarini O‘zbekistonga olib kirish, arab tilini o‘qitish bo‘yicha qo‘shma loyiha va ilmiy tadqiqotlarni amalga oshirish kabi masalalar yuzasidan hamkorlik qilishga kelishib olindi. 

Shuningdek, Qohira universiteti Arab tili ta’limini rivojlantirish markazi rahbari doktor Mustafo Orabi bilan tashkil etilgan uchrashuvda o‘zbekistonlik arab tili o‘qituvchilari uchun malaka oshirish hamda stajirovka dasturlarini tashkillashtirish, arab tilini masofadan o‘qitishni yo‘lga qo‘yish, hamkorlikda konferensiya va ilmiy seminarlar hamda talabalar uchun ta’til vaqtida arab tili kurslarini tashkil qilish masalalari muhokama qilindi.

Tashrif davomida doktor Mustafo Orabi yaqin hamkorlikka tayyor ekanligi, shuningdek, O‘zbekiston xalqaro islom akademiyasi va Qohira universiteti o‘rtasida Anglashuv memorandumini imzolash maqsadga muvofiq bo‘lishini ta’kidlab o‘tdi.