XALQARO E’TIROF
Imom Moturidiy xalqaro ilmiy-tadqiqot markazi tomonidan “Ta’vilot al-Qur’on” asarining 29-juzi o‘zbek tiliga tarjima qilindi. Ushbu asarning ilk marotaba o‘zbek tiliga tarjima qilinishi dunyo moturidiyshunosligida yuqori ilmiy natija sifatida baholandi. Zero, bu Imom Moturidiy tug‘ilib o‘sgan O‘zbekiston diyorida moturidiylik ta’limotining yana jonlanayotganidan darak beradi.
Jamiyatni olimlarsiz tasavvur qilib bo‘lmaydi. Biror davlatga baho berishda, albatta, u yerdan yetishib chiqqan olimlar birinchi navbatda tilga olinadi. Abu Mansur Moturidiy O‘zbekistonning Samarqand viloyatidan yetishib chiqib, islom ta’limotini ahli sunna val jamoa negizida yoritib berdi. Bu esa jamiyatni ahli sunna val jamoa tarkibida jipslashishga zamin yaratdi. Bugungi globallashuv sharoitida turli mutaassib oqimlarga qarshi kurashishda moturidiylik ta’limoti o‘ziga xos ahamiyat kasb etadi. Shu nuqtai nazardan, moturidiylik ta’limotiga oid ilmiy-ma’naviy merosning tarjima qilinishi o‘zbek kitobxonlariga katta quvonch bag‘ishlaydi.
Doktor, professor Kamoliddin Nuriddin Marjuniy
Malayziya Islom ilmlari universiteti professori, Fransiyadagi Yevropa Islom ma’rifati va madaniyati akademiyasi a’zosi, Imom Moturidiy xalqaro ilmiy-tadqiqot markazi Xalqaro ilmiy hay’ati a’zosi
Izohlar